本文最後更新於 28/03/2025 by 男人老狗
如果講近三十年, 變化最大的行業, 可以話係產品攝影. 數碼相機每年都有好大的進步, 令到普通的用家都可以享受到便宜而又效果好攝影圖像.
回想返入行果時, 未有數碼相機, 如果要喺印刷品上加入圖片, 只有拍照片, 菲林(又分負片同正片)或者插圖.
以前要影產品相, 大多會直接拎去攝影師個STUDIO影(除非有好大需要, 大部份公司都唔會自己SET個STUDIO同請一個攝影師, 太貴了) 90年代, 一張4X5的幻燈片, 拍攝價$800起, 仲未計有特別要求. 當年都有好多機會去STUDIO跟影相, 因為影一張相咁貴, 唔跟貼D, 影錯野就好大件事. 當年studio 基本設備都好多，唔講其他，剩係部影到4×5菲林嘅相機都牛龜咁大部，又要裝大燈，所以一間studio要好大地方同好多錢，唔同而家一部相機，一個燈箱已經應付到大部分工作。
如果以影像質量區分: 幻燈片>負片>相片
要拍一張有質數的幻燈片, 有好多細節要留意, 攝影師只可以喺個腦入面想像到點拍先會有要求的效果, 果種能力, 令我好羨慕. 當時拍攝並唔係好似而家影數碼相咁即刻見到效果, 係要等到沖晒出黎先知. 所以有好多攝影師都會將studio開喺近沖晒公司附近，方便做嘢。果時最大嘅沖晒公司有Robert LAM 同 Color Lab, 差唔多每個商業區都有門市。 沖一張4×5都要幾十蚊，附加效果另計 （例如加減曝光時間）。入行果時，電腦做設計初起步，無論軟件功能同硬件配套都未可以直接將稿件輸出做四色菲林，或者彩色打印做presentation。遇到有layout要加圖片，就會用拍好嘅幻燈片晒相，呢樣收費又係勁貴。做學生果時有份書刋設計作業要晒相，用135菲林拍完再晒，十張相已經要幾百蚊（1990年左右）。
基本拍攝程序:
擺位, 打燈, CHECK 光, 拍寶麗來睇大約效果(如果效果唔啱, 又要從頭做過), 之後先至拍攝真正的幻燈片. 好多時前三個步驟可以玩一日, 有試過拍一D不锈鋼產品, 一個SHOT可以拍兩日……亦有做過珠寶拍攝，個model只係拍對手，加埋隻鑽戒，拍左三日⋯⋯除左燈光之外，隻手拍得耐乾左有巢皮，又要等佢搽完cream 重新黎過，張幻燈片梗係唔止收$800，包左佢三日場喎⋯⋯都咪話
我覺得拍攝幻燈片最重要係色溫(Color temperature) , 如果色溫唔啱, D相就會偏黃或者偏藍, 未有Photoshop之前, 偏左色的相, 一係拍過, 一係靠分色公司去矯正, 幾大鑊架.
時代進步, 以前的難題, 而家可以喺數碼相機一個制就可以攪掂, 再唔係喺PS再執. 但相片的質素有無提升到, 又係另一個話題
(此文章曾在 Penana 發表）